Na Faraji Mwagowa,     

Dodoma. 

Mali zenye thamani ya zaidi ya shilingi milioni 500 zimeharibiwa katika soko la matunda na mbogamboga sabasaba mjini Dodoma baada ya vibanda vya wafanyabiashara takribani 600 kuvunjwa usiku wa manane na wanaodhaniwa kuwa askari wa manispaa.

Tukio hilo linadaiwa kuwaacha katika taharuki, simanzi na huzuni wafanyabiashara hao huku lawama nyingi zikielekezwa kwenye uongozi wa manispaa hiyo.

Wakizungumza mapema asubuhi wafanyabiashara hawa wanadai tukio hilo limefanywa usiku wa manane kutokana na ukweli kuwa halikuwa na uhalali wa kisheria kwani manispaa ndiyo iliyowapa eneo hilo kwa matumizi ya kibiashara.

Kamera ya Star Tv imeshuhudia vibanda vya biashara, mbogamboga, matunda pamoja na mali nyingine vikiwa vimeharibiwa vibaya hali inayotafsiriwa kuwarudisha nyuma kimaendeleo waathirika wa tukio hilo baada ya kubainika kuwa wengi wao wanategemea mikopo kuendesha biashara zao.

Kufuatia hali hiyo Mwenyekiti wa umoja wa wafanyabiashara wa soko hilo Athuman Makole anasema hatua hiyo haina budi kulaaniwa vikali na jamii kwani imekiuka makubaliano ya awali kati ya uongozi wa soko na ule wa manispaa.

Tukio hilo linadaiwa kufanyika chini ya ulinzi mkali huku risasi za moto zikidaiwa kurushwa ovyo hewani kwa lengo la kuwatawanya baadhi ya raia walioanza kujongea kwenye eneo la tukio kwa kudhani kuwa huenda majambazi wapo kazini.

Juhudi za kuwapata viongozi wa manispaa hazikuweza kufanikiwa kutokana na wengi wao kuwa katika mapumziko ya mwisho wa wiki huku simu zao nazo zikiwa zimezimwa.